在我第一份工作，就遇上了辦公室裡最討厭的人。
她40多歲，不是甚麼經理級、主任級的人物，但恃著自己十多年的資歷、高層都要畀少少面佢嘅地位，就擺出一副高高在上的姿態，教你呢樣嗰樣，俗稱「老屎忽」，但她比一般的「老屎忽」更損人不利己。
比我早一年入行的同事，跟我年齡相若，自然較傾得埋，他善意提醒我：「唉，你踏入咗呢度，真係步步都要好小心，尤其係佢⋯」他看著那位「老屎忽」，就叫她「May姐」好了。
「噢⋯你好似身受其害咁喎？」我問。
「唉，一陣食lunch話你知？如果唔係我又會畀人鬧。」
這位同聲同氣的巴打，叫Eric，是同Team中唯一一位廿多歲的後生仔，直至我的加入。
當年Fresh Grad的我雄心壯志，本著「我不害人，人就不害我」，只想把工作做好的態度上班，天真的不知這世上，總有些「你冇得罪佢，佢都會害你」的人活躍於職場。
上班已夠辛苦，他們還要把這裡弄得更地獄，把你拉入辦公室政治的
「唉，傻仔，佢哋見到你畀人鬧，咪開心囉。」Lunch Time終於到了，Eric開始把故事說出：「嗰陣我啱啱返工，第一日咋，就畀May姐篤背脊⋯⋯」
「吓⋯」
「嗰陣，我見個個人都會開網頁版WhatsApp，咁我都開囉，佢行過見到我喺度玩緊WhatsApp，本來諗住去廁所嘅佢，即刻兜個靚彎入咗經理房。」
「佢唔玩㗎咩？」我又天真地問。
「X！佢連Email都唔識用，講咩WhatsApp！」Eric再補充：「之後經理就叫咗我入房。」
「叫你唔好再WhatsApp？」
「仲有唔好成日遲到、做嘢冇心機、掛住上網、恰眼瞓⋯⋯篤背脊又點止一樣吖。」
「佢篤你背脊有咩著數？」
「佢冇著數唔緊要，最緊要係你冇著數。」Eric慨嘆：「係有人食飽飯冇屎痾㗎啦，算啦，你第一日返工，唔嚇你咁多喇，總之自己睇路啦！」
「咁你哋之後有冇面左左？！」
「哈哈，佢仲對我笑笑口，叫我畀心機做嘢，後生仔要捱得，唔好介意咁多。」
或許，每個辦公室都存在May姐這類人，他們每天最用心的工作，就是想辦法令你不能專心工作、討厭工作，然後若無其事地倒過來呻一下：「唉，返工真係好辛苦。」最後，拋低工作給你，準時走人，走前還大大聲「UR」一口胃氣。
------------------------
喜歡的話like我的page，會有更多故事及散文
FB: 莎比亞
IG: sapeiar
Search